Fortza, Sardigna, pèsadi e camina!
de Mariu Pudhu
Bogadiche, Sardigna, s’Istivale
Ca ti faghet andhare sempre a topu:
S’Istadu italianu no est nostru,
Petzi ti tenet pro t’irfrutuare.
Fàghedi onore libbertade istima:
Fortza, Sardigna, pèsadi e camina!
Zente istimada, no podes istare
A birgonza in debbadas ispetendhe
S’Itàlia ch’in tot’àteru est pessendhe
Ca tenet runzas suas de ratare.
Fàghedi onore…
S’Itàlia nos zughet in busaca
Che una innenneria posta a un’ala,
Nos at petzi mandhadu innoromala
E frigura faghimus tonta e maca.
Fàghedi onore…
Che incravada pro ti guvernare,
No faghes ne de manos ne de pese
E peus a disastru ’e su chi sese
Bi est solu chi che afunghes in su mare!
Fàghedi onore…
Su mesu de sa zente est emigrada,
Sunt totu sas piaes in cranghena
E isperas ancora in manu anzena
Sa chi nche cheret própiu segada!
Fàghedi onore…
Ca fitianu at fatu irfrutamentu
Ti che at surzidu sàmbene e suore
E nudha, prus de istúpidu s’onore
Cun irbandhonu, mai ndh’amus tentu.
Fàghedi onore…
Sempre teraca posta a teracare,
Ti at irfrutadu ca ses miniera,
Pro criminales suos a galera
T’at fatu totu e base militare.
Fàghedi onore…
Ses fintzas bella a muntonarzu sou
Ca tenet arga meda de frundhire;
Tue mancu resessis a ischire
Cantu e cale est su torracontu tou!
Fàghedi onore…
No pro àteru fintzas ti cossolas
E ringràtzias puru e ti cuntentas
Daghi tempus l’avassat e s’ammentat,
Candho totu passadu est de cassola!
Fàghedi onore…
Ma si as de currer, a cambas truncadas
Za tenes bellu isetu a mezorare!…
No ndhe podes su passu a caminare
Sighindhe a perder samben in debbadas.
Fàghedi onore…
Candho mai a fagher pagamentas
A unu ladru pro ti guvernare?!
Tue sighis a perder sacu e sale
Si de pedire a ladros ti cuntentas!
Fàghedi onore…
Natzione distinta e sinnalada
In sos séculos tenes sa bisura;
Ma oe za la faghes sa frigura
Essindhe in tricolore mascarada!…
Fàghedi onore…
T’at fatu chentza numen ne resone
Mancu a tie cumpares su chi sese,
A chie ti collonat petzi crese
Mancari ti apat postu a mamutone.
Fàghedi onore…
Chentu otanta chilómitros de mare,
Mancu s’Àfrica gai ch’est ifora!,
Ne s’istória prus pretzis’ancora
Paret chi bastant pro ti abbizare.
Fàghedi onore…
Tot’ateruna zente e natzione,
Terra chentza guvernu guvernada,
T’at lassadu che fémina ingannada
Cun su burdu de itàlica Regione.
Fàghedi onore…
A zente nos at fatu tzega e tonta
De no bider manc’ue ndhe istamus
E che macos illusos nos pessamus
Su chi no semus, e ne ite contat!
Fàghedi onore…
A bartzolu de ódios ti at fatu,
Pares sa tana ’e sos espes terranzos,
T’isterres a tapeto a sos istranzos
Ma tra Sardos faghimus disacatu!
Fàghedi onore…
No amus fide in nois ma creimus,
Si est istranzu, a donzi culu ’e cane
Ch’inoghe si presentat e infame
Donzi borta unu corru ndhe tenimus!
Fàghedi onore…
A fora da’inoghe Istadu istranzu,
In Sardigna su Sardu torret mere:
Diritu universale est e dovere
E de nois dipendhet su balanzu!
Fàghedi onore…
S’Itàlia no est pessendhe a tie:
A tie tocat chi bi pesses tue!
In su mundhu su Sole bi est totue
E fintzas pro te puru faghet die!
Fàghedi onore…
