Candu morru
di Francu Pilloni
“Candu morru” hiat nau a mimi etotu unu cabudu de cena chi fui sezziu in sa forredda coendimì unu ou spudau in su farifari “candu morru, m’hiat a praxi de ddoi essi presenti”.
E no, cumenti cumbinat a medas a s’edadi mia, di essi corcau in su lettu ma cun sa menti circhendi sparau in sa costa de Corongiu.
E a sa sennora cun sa frullana a coddu dd’hap’a nai chi seu prontu a dda poni infatu, bastat chi mi lessit su tempus de torrai a bivi tres momentus de sa vida mia.
“Fai in pressi” m’hat a respundi “ca in custas dìs no accudu cun sa cosa de fai. Si totus faiant che tui… bonanotti!”
Seu becciu, ma no stanteriau e no seu accappiau a custu mundu prus de su tanti.
Sa primu cosa ch’hiat a bolli biri est su bentu de s’ira, cussu chi movit de truessu e bittit stresuras de aqua e de terra arrubia. Bollu torrai a biri is opinus de Pubuzzi totus spampasullaus. Bollu intendi su princhiu de is nais de sa mata de s’olia de s’ortu candu trisinant impari. E bollu intendi su cannisoni de su cannaxu de sa Mannassa, chi prangit e sonat comente un’omini becciu chi si sonat su nasu.
“E pustis?”.
E pustis bollu intendi unu pipiu prangendi in su coru de sa notti. E sa mamma chi dd’annìnniat, e su cantu chi s’ammesturat a su prantu, finzas candu si citint ambaduus.
“Po finzas a immui no m’hat pediu cosas impossibilis. Sighi a nai.”.
Po ultimu bollia biri su soli scappeddendi de su cuccuru de Gennaspina, alluxendi asuba de is cana-lis arrosinaus. E biri sa nappa de s’arrangiolu grogu e nieddu carriga de pibionis de arrosu chi luxint contrassoli comente prendas de cristallu olandesu. Mi bollu preni is ogus de cussa luxi…
Pustis ti sigu comente unu callalleddu.
“Bandat beni totu, ma no cumprendu sa scera”.
No est difficili. Cun su bentu de s’ira bollu torrai piticu piticu anante is cosas de su mundu, perdendi sa folla e is cambus chi mi funti crescius me is annus. Comente donnia mata, su chi contat est su truncu e is arraxinas. Cun su prantu de su pipiu bollu torrai nozzenti e in poderi de atiri, po chi don-nia scienzia, donnia sabiori, donnia superbia e donnia barrosia, amenguint a pagu a pagu comente su prantu de su pipiu anante s’anninnia de sa mamma. E, po ultimu, mi bollu preni is ogus de luxi, de cudda luxi chi m’hiat allampainau una dì candu, piccioccheddu, fui andau a cassa avatu de babbu. Creu chi assumancu po custu mi cumprendasta.
“No m’accuntessit de indi messai medas che tui. Bolli nai chi mi ponis infattu comente chi essit babbu tuu?”.
Si ti praxit a ddu crei, aici esti.
